الناس و الترامادول

عندك صداع ؟ حاسس بضعف جنسى ؟ مش قادر تشتغل و حاسس بلخلخة فى ركبك و مكسح ؟ عاوز تبقى حصان بيرمح ؟ 48 ساعة فى اليوم ؟ عاوز تقول كلام موزون ؟ عاوز تحس بنعنشه و تبقى فريش ؟ 

مش مركز و عاوز مخك يبقى زى الكمبيوتر ؟ عاوز تجرى جنب الموتوسيكل و تسبقه ؟ عاوز تبقى طرزان و مصحصح مالكش غيره خدلك حباية و انسى وكله حيبقى تمام . إزاى سايب نفسك كده من زمان يا مسكين ؟ دا انت مش عايش  دا الدكاتره بياخدوه و مزاجهم عناب . خد بلبع حباية و لا اتنين و شوف حتعمل إيه حتكسر الدنيا و بكره تدعيلى .

كل دا حديث يومى بنسمعه من ناس كتير و المقصود طبعا المحروس اللى اسمه ترامادول حبوب مخدرة معمولة لسبب تانى خالص بعيد عن قصص الشارع و نصايح المتخلفين و العالم البزرميط . وباء و انتشر فى المجتمع و تلاقى الشباب و العيال و الرجالة عمالين يبلبعوا كل شوية من نص حباية لضرب شريط و اتنين فى اليوم لزوم الصحصحة و القدرة على الشغل و الصدمة لما تلاقى ناس فاكرهم محترمين و تلاقيهم من أهل البلبعة يعنى بالعربى كله ماشى إما بحبوب ضغط و قلب أو كيسة أدوية و دول المرضى أو قصطرة بول مدلدلة من تحت الجلابية و ماسكها فى ايده بيعرضها على العيون علشان يشحت بيها و دول طايفة من الشحاتين و اللى المفروض إسمهم أسوياء شايلين شريط ترامادول فى جيب البنطلون الورانى أو فى جيب جاكت البدلة الجوانى لكن لكل قاعده شواذ لا بيتعاطوا أى نوع من اللى سابق ذكرهم إلا بأمر طبيب حال المرض و طبعا دول مغفلين العصر الحديث و مش طبيعيين يعنى نقدر نسميه عصر بيع الوهم طيب إيه بقا حكاية العقار السحرى قوى ده نقولكم .

عقار الترامادول ينتمى نسبه لأملاح المورفين المخدر و بيستخدم لعلاج الآلام المتوسطة و الشديدة زى اللى فى السرطانات ربنا يعافى الجميع . و كمان ليه تأثير بيسبب تغيير كبير فى ضغط الدم و نظام القلب بصورة عامة . و كمان بيسبب انخفاض فى ضغط الدم و أحيانا إرتفاع . و بما إنه من مشتقات أملاح المورفين بيسبب الغثيان و ضعف التركيز و آلام فى المعدة و إسهال و تنميل فى الأطراف و قد يؤثر فى الكبد لما يتم تناوله لمدة كبيرة و طبعا لا حياة لمن تنادى بين المدمنين أما بقا عن عملية الإنسحاب  بتاعته و الإعراض عنه كمان مش بالساهل فمثلا خد عندك هذيان و ميل للقىء و إسهال و صعوبة تنفس و الكبير قوى بقا هى الهلوسة يعنى من شخص محترم لمش محترم و على فكره مالوش دخل فى العملية الجنسية لأنها عملية نفسية قبل كل شىء .

و لم يكتفوا بالتعاطى من نصيب المرضى الموصوف لهم كعلاج لأ راحوا كمان استوردوا من الهند و الصين بالألوان إشى أحمر و إيشى مش عارف إيه خيبة تقيلة و حلت على بلدنا و على شعبنا لما تخلى جاهل و مالوش قيمة يروح يستورد و يهرب حبوب مخدرة علشان يدمر بيها شعب كامل جهاله و متعلميه و تخلى الكل عبيد لحبايه و للى بيتاجروا فيها هذا يحدث حين يسلب الله من الناس عقولهم يا ترى إيه الفرق بين اللى راضى يعيش من غير عقل و بين الأنعام ؟.

فى شرم الشيخ نط من الشباك و اغتصب سائحة بريطانية

إعترفت وزارة السياحة باغتصاب بتاع الأمن فى أحد فنادق الشرم لسايحة بريطانية لأ و إيه جرايد بريطانيا فضحت الموضوع و راحت السايحة عملت محضر فى شرطة السياحة و الفضيحة بقت بجلاجل دا حتى حرام مبقاش حد بيعذر الشباب المتهور المتهيج الأرعن خلاص مفيش رحمة طيب و فيها إيه لما الواد ينط من الشباك بتاع الأوضة ؟  و يقتحم خلوة السايحة و يغتصبها فيها إيه يا عالم حد يقولنا ؟ و ليه بريطانيا تحذر رعاياها ليه ؟ هى ناقصة و يقال إن فيه سايحة روسية كمان وقعت فى الفخ و رفضت الإبلاغ على كل حال الموضوع مش محتاج وقفة و لا حاجة علشان كل حاجة داخلة فى بعضها و صعب نضبطها. إزاى؟ نقول لكم . كتير من اللى فى شرم بيشتغلوا غير مؤهلين يعنى إيه غير مؤهلين ؟ يعنى مش مؤهلين نفسيا و ثقافيا أو علميا و لغويا للتعامل مع السواح البحث عن عمل رماهم على شرم أو الغردقة و بصوا لقوا نفسهم قدام البكينى أبو فتلة وجها لوجه و أجسام ما تعرفش المحشى و طبيعة فيها حرية و دلع و ألخ ألخ. هوبا تظهر الفضايح و بلاهة الفلاحين و ثقافة العزبة و الحارة و الزقاق و اندفاع الشباب بيتسهل لدرجة كبيرة لما كله يكون عادى قدامه شايف البوس و الأحضان و الذى منه بدون إذن. طيب و العمل فى الموضوع دا إيه ؟ يكون فيه إختبارات نفسيه لعمال السياحة و يشوفوا قدرتهم على تحمل المناظر دى و صراحة مش عارف حيقدروا على عبور الإختبارات دى و لا لأ علشان هناك الرجالة بتقع فرائس المناظر الخلابة دى ههههه أمال اللى يزور الشرم بيزورها ليه علشان يغطس يعنى بس ؟ بجد الموضوع صعب و ياريت الموضوع قاصر على الإغتصاب لأن الواد اللى اغتصب البريطانية أهبل و باين عليه عمره ماشاف سايحه . لأن 90% من الروسيات اللى جايين سياحة بيمارسوا الجنس و عن معرفة بكده بقول كلامى بحكم الشغل فى الشرم لسنوات عدة و شفنا شبان بيقعوا كتير فى المحظور و فى المخدرات و شرب الخمور و خلافه . و التحرش موجود فى كل المحافظات بشكل مخيف و ببجاحة و وقاحة مش مسبوقين شباب مكبوت و بنات بملابس مش طبيعية ضيقة و شفافة و قصيرة و ضيف بقا عمايل البانجو و البطالة و البلطجة بجد وضع خطير و عملية معقدة اللى يحلها لازم ياخد جايزة نوفل . و لكن لما نشوف شبان و بنات مؤدبين و ملتزمين و محترمين نبص عليهم و نقول الله يرحم زمن الفن الجميل . 

هدف محمد صلاح الأول مع تشيلسى فى شباك أرسنال 22/3/2014

الهدف الأول لمحمد صلاح النجم المصرى فى صفوف تشيلسى الإنجليزى بشباك الأرسنال جاء نتيجة إنفراد بعد تمريرة رائعة من زميله قطع خلالها بالكرة حتى دخل منطقة جزاء أرسنال فى إنفراد صريح ليضع الكرة من تحت حارس المرمى محرزا هدفا جميلا .

لو زرتنا إتبرع بدولار

و الله حاجة تفضح قال عاوزين يخلوا السواح لما يزوروا البلد يتبرع كل واحد منهم بدولار عن اليوم علشان السياحة الغلبانة واقعانة يانا طيب و السائح ماله و مال وقوع السياحة إذا كان هو نفسه ما بيجيش ههههه حنقولوا لو جيت حتدفع معونة و ربنا كلام فارغ  عارفين ليه علشان السواح اللى بييجوا هنا عندنا 90% منهم مش سواح أساسا دول شوية متسولين .

العجيبة غالبية السواح اللى بيزورونا سواح من الشقيقات روسيا و أوكرانيا و صربيا و بولندا و كل واحد من الجنسيات العجيبة المريبة دى بيجى عندنا معاه 100 دولار و يرجع بلده معاه 200 يعنى بدل ما ينفق بيرجع كسبان طيب إزاى تزور و تكسب دى بس عندنا علشان إحنا بلد فريد فى نوعه و نحب ندلع السواح و نفسحهم و نعزمهم و نشترى ليهم هدايا و هما مسافرين بلدهم و كمان نعطيهم تمن المواصلات الداخلية لحد باب بيتهم هههه سلم لى على السياحة مثلا ممكن تعلم السواح الروس من الشبشب اللى لابسينه بس بصراحة بناتهم حلوين مش كلهم بس غالبيتهم و لأننا عاطفيين قوى كتير بيصعب عليهم يردوا الحلاوة دى على بلدها يتجوزوهم و يخلوهم معانا تقوم بسلامتها تبعت لماما و تيتى و جدو و خالتو و اخواتها يزوروها و طبعا جايين سياحة يسيحوا و ياخدوا واجبهم 100 فل و 14 و يرجعوا و ممكن فى المستقبل لو طبقوا دولار على كل سايح ندفع احنا الدولار و عيب نكلف نسايبنا مش كده و لا إيه .

مين رشح فيفى

عيد الأم السنة دى كان و لا كل عيد لأن طعمه كان على واحدة و نص علشان الناس إتعودوا على الإحتفال بأغنية ست الحبايب يا حبيبة بتاعة فايزة أحمد . و دا نوع واحد من الفن حبوا يضيفوا نوع كمان و هو الرقص للعيد و مش بس كده دول جابوا نوع الفن اللى ضافوه مجسم فى صورة فلتة الهز الشرقى ( عطيات ) فيفى عبده اللى يظهر الأمهات اللى ضحوا و سهروا و تعبوا و ربوا و قاسوا الفقر و الحرمان بقوا عملة نادرة فى بلدنا علشان فيفى يعطوها الجايزة و طبعا الخبر كان زى الصاعقة مش على كل الأمهات فى مصر اللى مايعرفوش أساسا مسابقة الأم المثالية دى بيتقدموا ليها إزاى و لا إختيار الأمهات بيكون إزاى دى كانت الصاعقة على الرجالة و الأطفال و الشباب و البنات .

طيب فى السنوات القادمة حيكون شكل المسابقة عامل إزاى و يا ترى حيخلوها للأمهات اللولبيات بس و لا حيضيفوا أنواع تانية للترشح و يمكن يعملوا مواصفات خاصة لجسم الأم المثالية يعنى مش لازم تكون من أكلة حلل المحشى و لا الكرشة و الكوارع لا سمح الله يعنى .

و طبعا لازم يكون ليها تاريخ مفضوح أو القصد  معروف للكل و عن الهوايات بقا حدث و لا حرج يعنى هواية الكركرة و الأربعة و خلافه أمال مثالية إزاى و لازم نعمل مظاهرات علشان يخلوا لجنة التحكيم متخصصة فى المجال .

لأن الأم مرقصة إن أعددتها أعددت شعبا مدمن الرقصات .

و بالنسبة للأمهات العاديين لازم نعمل ليهم مسابقة موازية معلش مش حتكون مذاعة و مفيش فيها جوايز غير اللى نقدر على لمها من الغلابة و سلم لى على المثالية .